ചരിത്രനിമിഷം. ഇന്ത്യന്‍വംശജന്‍ ഋഷി സുനക് ബ്രിട്ടന്റെ പ്രധാനമന്ത്രിയായി അധികാരമേറ്റു. ചാള്‍സ് മൂന്നാമന്‍ രാജാവാണ് ഋഷിയെ പ്രധാനമന്ത്രിയായി നിയമിച്ചത്.. ബ്രിട്ടന്റെ 200 കൊല്ലത്തെ ചരിത്രത്തിലെ ഏറ്റവും പ്രായം കുറഞ്ഞ പ്രധാനമന്ത്രിയാണ് 42-കാരനായ ഋഷി. പൊതുസഭാ നേതാവും മുഖ്യ എതിരാളിയുമായിരുന്ന പെന്നി മോര്‍ഡന്റ്, കണ്‍സര്‍വേറ്റീവ് പാര്‍ട്ടിയുടെ പ്രധാനമന്ത്രിസ്ഥാനാര്‍ഥിത്വ മത്സരത്തില്‍നിന്ന് പിന്മാറിയതോടെയാണ് ഋഷിക്ക് അധികാരത്തിലേക്ക് വഴിതുറന്നത്.

അതെ സമയം സാമ്പത്തിക സ്ഥിരത ഉറപ്പിക്കലാണ് പ്രധാന ലക്ഷ്യമെന്നും അതിനായി കടുത്ത തീരുമാനങ്ങള്‍ പ്രതീക്ഷീക്കാമെന്നും സുനക് അധികാരത്തിലേറിയ ശേഷം നടത്തിയ പ്രസംഗത്തിൽ പറഞ്ഞു. മുന്‍ പ്രധാനമന്ത്രി ലിസ് ട്രസിനും സുനക് നന്ദിയറിയിച്ചു. രാജ്യത്തെ വികസനത്തിലേക്കെത്തിക്കെത്തിക്കാനുള്ള പരിശ്രമമായിരുന്നു അവര്‍ നടത്തിയതെന്നും സുനക് അറിയിച്ചു.

കിഴക്കൻ ആഫ്രിക്കയിൽ നിന്ന് കുടിയേറിയ ഇന്ത്യൻ മാതാപിതാക്കളുടെ മകനായി 1980 മെയ് 12ന് സതാംപ്ടണിൽ ജനിച്ച സുനക് വിദ്യാഭ്യാസം നേടിയത് വിൻചെസ്റ്റർ കോളേജിലായിരുന്നു. തുടർന്ന് അദ്ദേഹം ഓക്സ്ഫോർഡിലെ ലിങ്കൺ കോളേജിൽ തത്ത്വചിന്ത, രാഷ്ട്രീയം, സാമ്പത്തിക ശാസ്ത്രം എന്നിവ പഠിക്കുകയും പിന്നീട് സ്റ്റാൻഫോർഡ് സർവകലാശാലയിൽ നിന്ന് ഫുൾബ്രൈറ്റ് സ്കോളറായി എംബിഎ നേടുകയും ചെയ്തു. സ്റ്റാൻഫോർഡിൽ പഠിക്കുമ്പോൾ, ഇൻഫോസിസ് സ്ഥാപിച്ച ഇന്ത്യൻ കോടീശ്വരനായ വ്യവസായി എൻ ആർ നാരായണ മൂർത്തിയുടെ മകൾ അക്ഷത മൂർത്തിയെ അദ്ദേഹം കണ്ടുമുട്ടി. ബിരുദം നേടിയ ശേഷം അദ്ദേഹം ഗോൾഡ്മാൻ സാക്‌സിലും പിന്നീട് ഹെഡ്ജ് ഫണ്ട് സ്ഥാപനങ്ങളായ ദി ചിൽഡ്രൻസ് ഇൻവെസ്റ്റ്‌മെന്റ് ഫണ്ട് മാനേജ്‌മെന്റ്, തെലെം പാർട്‌ണേഴ്‌സ് എന്നിവയിലും പങ്കാളിയായി ജോലി ചെയ്തു.

2015 ലെ പൊതു തിരഞ്ഞെടുപ്പിൽ റിച്ച്മണ്ടിലേക്ക് (യോർക്ക്) തിരഞ്ഞെടുക്കപ്പെട്ട അദ്ദേഹം തെരേസ മേയുടെ രണ്ടാമത്തെ സർക്കാരിൽ പാർലമെന്ററി അണ്ടർ സെക്രട്ടറി ഓഫ് സ്റ്റേറ്റ് ആയി സേവനമനുഷ്ഠിച്ചു. 2017 ലെ പൊതു തിരഞ്ഞെടുപ്പിൽ 23,108 (40.5%) ഭൂരിപക്ഷത്തോടെ സുനക് വീണ്ടും തിരഞ്ഞെടുക്കപ്പെട്ടു. 2018 ജനുവരി മുതൽ 2019 വരെ അദ്ദേഹം തദ്ദേശഭരണ സംസ്ഥാന പാർലമെന്ററി അണ്ടർ സെക്രട്ടറിയായി സേവനമനുഷ്ഠിച്ചു. അന്നത്തെ പ്രധാനമന്ത്രി തെരേസ മേയുടെ ബ്രെക്‌സിറ്റ് പിൻവലിക്കൽ കരാറിന് വേണ്ടി മൂന്ന് തവണയും സുനക് വോട്ട് ചെയ്യുകയും ഏതെങ്കിലും പിൻവലിക്കൽ കരാറിന്മേലുള്ള ഹിതപരിശോധനയ്‌ക്കെതിരെ വോട്ട് ചെയ്യുകയും ചെയ്തു.