മ്യാൻമറിന്റെ സൈന്യവും വിമതരും തമ്മിലുള്ള പോരാട്ടം രൂക്ഷമായതിനെത്തുടർന്ന് 5,000 ത്തിലധികം ആളുകൾ കിഴക്കൻ മ്യാൻമറിൽ നിന്ന് തായ്‌ലൻഡിലേക്ക് പലായനം ചെയ്തതായി തായ് മാധ്യമങ്ങളും ഉദ്യോഗസ്ഥരും അറിയിച്ചു. തായ്‌ലൻഡിലെ തക് പ്രവിശ്യയിൽ അഭയം തേടി മ്യാൻമറിലെ മ്യാവഡി ജില്ലയിൽ നിന്ന് ബുധനാഴ്ച രാത്രിയോടെ 800-ലധികം കുട്ടികൾ ഉൾപ്പെടെ 5,428 സാധാരണക്കാർ അതിർത്തി കടന്നതായി പബ്ലിക് ബ്രോഡ്കാസ്റ്റർ തായ് പിബിഎസ് റിപ്പോർട്ട് ചെയ്തു. അതെ സമയം മ്യാൻമറിലെ പല ഗ്രാമങ്ങളിലും സൈന്യം ആക്രമണം രൂക്ഷമാക്കി.

2021 – ൽ മ്യാന്മറിൽ തെരഞ്ഞെടുക്കപ്പെട്ട സർക്കാരിനെ പുറത്താക്കി കൊണ്ട് സൈനിക സർക്കാർ അധികാരത്തിലേറിയ ശേഷം ജനകീയ പ്രതിഷേധങ്ങൾക്കും, വിമതർക്കുമെതിരെ ആക്രമണം പതിവായിരുന്നു. മ്യാൻമറിലെ വിമതർ പതിറ്റാണ്ടുകളായി സ്വയംഭരണത്തിനായി പോരാടുകയാണ്, അതിർത്തിയിലെ ഏറ്റുമുട്ടലുകളും വ്യോമാക്രമണങ്ങളും തായ്‌ലൻഡിന്റെ അതിർത്തി പ്രവിശ്യകളിലേക്ക് മ്യാൻമർ ഗ്രാമവാസികൾ ഇടയ്ക്കിടെ പലായനം ചെയ്യാൻ കാരണമായി, തായ്‌ലൻഡ് സർക്കാർ അവർക്ക് നാട്ടിലേക്ക് മടങ്ങുന്നതിന് മുമ്പ് താൽക്കാലിക അഭയം വാഗ്ദാനം ചെയ്തിട്ടുണ്ട്.

മ്യാൻമറിന്റെ അതിർത്തിയിൽ വ്യാഴാഴ്ചയും ഏറ്റുമുട്ടൽ തുടരുകയാണെന്നും തായ് ഭാഗത്ത് നിന്ന് വെടിയൊച്ചകൾ കേൾക്കുന്നുണ്ടെന്നും തായ് അതിർത്തി ജില്ലയായ മേ സോട്ടിൽ നിന്നുള്ള ഒരു ഉദ്യോഗസ്ഥൻ അസോസിയേറ്റഡ് പ്രസ്സിനോട് പറഞ്ഞു. വിവരങ്ങൾ പുറത്തുവിടാൻ തനിക്ക് അധികാരമില്ലാത്തതിനാൽ തിരിച്ചറിയരുതെന്ന് ആവശ്യപ്പെട്ട ഉദ്യോഗസ്ഥൻ, നിലവിൽ തായ് അധികൃതരുടെ സംരക്ഷണയിലുള്ള അഭയാർത്ഥികളുടെ എണ്ണം കുറഞ്ഞത് 5,000 ആയിരിക്കുമെന്ന് അറിയിച്ചു.