ഇന്ത്യയുടെ ഫുട്ബോള് ഇതിഹാസം സുനില് ഛേത്രി അന്താരാഷ്ട്ര ഫുട്ബോളില് നിന്ന് വിരമിക്കുന്നു. ജൂണ് ആറിന് കുവൈത്തിനെതിരേ നടക്കുന്ന ലോകകപ്പ് യോഗ്യതാ മത്സരത്തിനു ശേഷം വിരമിക്കുമെന്ന് ഛേത്രി പ്രഖ്യാപിച്ചു. സോഷ്യല് മീഡിയയിലൂടെയായിരുന്നു 39-കാരനായ താരത്തിന്റെ പ്രഖ്യാപനം. 2005ല് പാകിസ്ഥാനെതിരായ മത്സരത്തിലാണ് ഛേത്രി അരങ്ങേറ്റം കുറിക്കുന്നത്. തുടര്ന്നിങ്ങോട്ട് 19 വര്ഷം അദ്ദേഹം ഇന്ത്യന് ജേഴ്സിയിലുണ്ടായിരുന്നു. അന്താരാഷ്ട്ര ഫുട്ബോളില് സജീവമായി കളിക്കുന്നവരില് ഗോള്നേട്ടത്തില് മൂന്നാമതാണ് ഛേത്രി.
2011ല് അര്ജുന അവാര്ഡും 2019ല് പത്മശ്രീയും ലഭിച്ചതിന് പുറമെ ആറ് തവണ എഐഎഫ്എഫ് പ്ലെയര് ഓഫ് ദ ഇയര് അവാര്ഡും ഛേത്രി നേടിയെടുത്തു. അന്താരാഷ്ട്ര വേദിയില്, 2008ലെ എഎഫ്സി ചലഞ്ച് കപ്പ്, 2011, 2015 വര്ഷങ്ങളിലെ സാഫ് ചാമ്പ്യന്ഷിപ്പ്, നെഹ്റു കപ്പ് (2007, 2009, 2012), 2017, 2018ലെ ഇന്റര്കോണ്ടിനെന്റല് കപ്പ് എന്നിവ നേടിയ ഇന്ത്യന് ടീമുകളുടെ ഭാഗമാണ് ഛേത്രി. രാജ്യത്തിനകത്തും പുറത്തുമായി ഒമ്പത് ക്ലബ്ബുകള്ക്കായി സുനിൽ ഛേത്രി ബൂട്ടണിഞ്ഞു..
വിരമിക്കല് തീരുമാനമെടുത്തുകൊണ്ട് ഛേത്രി പങ്കുവച്ച വീഡിയോ കാണാം..