വിദേശത്ത് ജോലി നേടുന്നവർ തട്ടിപ്പിന് ഇരയാകാതെ ജാഗ്രത പുലർത്തണമെന്ന നിർദേശവുമായി ഇന്ത്യൻ വിദേശകാര്യമന്ത്രാലയം. വിദേശത്ത് തൊഴിൽ വാഗ്ദാനം ചെയ്ത് വഞ്ചിക്കപ്പെടുന്ന പരാതികൾ വ്യാപകമാകുന്ന പശ്ചാത്തലത്തിലാണ് വിദേശകാര്യ മന്ത്രാലയത്തിന്റെ ഇടപെടൽ. സാ​ധു​ത​യു​ള്ള തൊ​ഴി​ൽ​വി​സ​യി​ൽ മാ​ത്ര​മേ വി​ദേ​ശ രാ​ജ്യ​ത്ത് എ​ത്താ​വൂ എ​ന്ന് ഇ​ന്ത്യ​ൻ എം​ബ​സി​യും മു​ന്ന​റി​യി​പ്പ് ന​ൽ​കു​ന്നു. ര​ജി​സ്റ്റ​ർ ചെ​യ്യാ​ത്ത ഏ​ജ​ന്റു​മാ​ർ സ​മൂ​ഹ​മാ​ധ്യ​മ​ങ്ങ​ളി​ലൂ​ടെ നടത്തുന്ന റി​ക്രൂ​ട്ട്​​മെ​ന്റ് ഡ്രൈവിനെതിരെ ജാഗ്രത പുലർത്തണം എന്നും എംബസ്സി നിർദേശിക്കുന്നു.

ര​ജി​സ്റ്റ​ർ ചെ​യ്യാ​ത്ത​തും നി​യ​മ​വി​രു​ദ്ധ​വു​മാ​യ റി​ക്രൂ​ട്ടി​ങ് ഏ​ജ​ന്റു​മാ​ർ ഇ​ന്ത്യ​ൻ വി​ദേ​ശ​കാ​ര്യ മ​ന്ത്രാ​ല​യ​ത്തി​ൽ നി​ന്ന് ലൈ​സ​ൻ​സ് നേ​ടാ​തെ​യാ​ണ് പ്ര​വ​ർ​ത്തി​ക്കു​ന്ന​ത്. ഇ​വ​ർ വ്യാ​ജ​മോ, നി​യ​മ​വി​രു​ദ്ധ​മോ ആ​യ ജോ​ലി​ക​ൾ വാ​ഗ്ദാ​നം ചെ​യ്യു​ക​യും തൊഴിലന്വേഷകരി​ൽ​നി​ന്ന് ര​ണ്ടു മു​ത​ൽ അ​ഞ്ചു ല​ക്ഷം രൂപ വ​രെ ഈ​ടാ​ക്കു​ക​യും ചെ​യ്യു​ന്നു​ണ്ടെ​ന്നാ​ണ് പുറത്തുവന്നിരിക്കുന്ന റിപ്പോർട്ടുകൾ. ഫേ​സ്ബു​ക്ക്, വാ​ട്സ്ആ​പ്, ഇൻസ്റ്റഗ്രാം ടെ​ക്‌​സ്‌​റ്റ് മെസേജുകൾ തു​ട​ങ്ങി​യ​വ​യി​ലൂ​ടെ​യാ​ണ് ഇ​വ​ർ ഇ​ര​ക​ളെ വീഴ്ത്തുന്നത്. കൃ​ത്യ​മാ​യ ഓ​ഫി​സോ വി​ലാ​സ​മോ ഇ​ല്ലാ​തെ​യാ​ണ് ഇ​വ​ർ പ്രവർത്തിക്കുന്ന​ത്. അ​തു​കൊ​ണ്ടു​ ത​ന്നെ പരാ​തി​ നൽകിയാൽ ന​ട​പ​ടി​യെ​ടു​ക്കാ​നോ ത​ട്ടി​പ്പു​കാ​രെ കണ്ടെ​ത്താ​നോ പ​ല​പ്പോ​ഴും സാ​ധി​ക്കാ​റി​ല്ല. ഗ​ൾ​ഫ് രാ​ജ്യ​ങ്ങ​ൾ, കിഴക്കൻ യൂ​റോ​പ്യ​ൻ രാജ്യങ്ങ​ൾ, മ​ധ്യേ​ഷ്യ​ൻ രാ​ജ്യ​ങ്ങ​ൾ, ഇ​സ്രാ​യേ​ൽ, കാ​ന​ഡ, മ്യാ​ന്മ​ർ, ലാ​വോ​സ് എന്നിവിടങ്ങളിൽ ജോ​ലി വാ​ഗ്ദാ​നം ചെ​യ്ത് ത​ട്ടി​പ്പ് ന​ട​ത്തു​ന്ന സം​ഘ​ങ്ങ​ൾ വ്യാപകമാണെന്നും മു​ന്ന​റി​യി​പ്പി​ൽ പറയുന്നു.

തൊ​ഴി​ൽ ക​രാ​റി​ൽ ശ​മ്പ​ള​വും മ​റ്റ് ആ​നു​കൂ​ല്യ​ങ്ങ​ളും സം​ബ​ന്ധി​ച്ച് വ്യക്തതയുണ്ടാകണം. ര​ജി​സ്റ്റ​ർ ചെ​യ്ത റി​ക്രൂ​ട്ട്മെ​ന്റ് ഏ​ജ​ന്റു​മാ​ർ ഇ​ന്ത്യ​ൻ ഗവൺമെന്റ് കു​ടി​യേ​റ്റ തൊ​ഴി​ലാ​ളി​ക​ൾ​ക്കാ​യി ഏ​ർ​പ്പെ​ടു​ത്തി​യി​രി​ക്കു​ന്ന പ്ര​വാ​സി ഭാ​ര​തീ​യ ബീ​മാ യോ​ജ​ന​യി​ൽ തൊ​ഴി​ല​ന്വേ​ഷ​ക​രെ നിർബന്ധമായും ചേർക്കണം.പ്ര​വാ​സി മരണപ്പെട്ടാൽ 10 ല​ക്ഷം രൂ​പ വ​രെ പ്ര​വാ​സി ഭാ​ര​തീ​യ ബീ​മാ യോ​ജ​ന​യി​ൽ ചേ​ർ​ന്നാ​ൽ ല​ഭി​ക്കും. ജോ​ലി സം​ബ​ന്ധ​മാ​യ പ​രി​ക്കു​ക​ളു​ണ്ടാ​യാ​ലും ചി​കി​ത്സ ചെ​ല​വു​ക​ള​ട​ക്കം ആനു​കൂ​ല്യ​ങ്ങ​ൾ ല​ഭി​ക്കും. ഒ​റ്റ​ത്ത​വ​ണ പ്രീ​മി​യം 275 രൂ​പ​യാ​ണ് ര​ണ്ടു വർഷത്തേക്കുള്ള ക​വ​റേ​ജി​ന് ന​ൽ​കേ​ണ്ട​ത്.