റോയൽ ഒമാൻ പൊലീസ് 51 നുഴഞ്ഞുകയറ്റക്കാരെ അറസ്റ്റ് ചെയ്തു. ദോഫാർ ഗവർണറേറ്റിലെ കോസ്റ്റ് ഗാർഡ് പൊലീസിന്റെ നേതൃത്വത്തിലാണ് അറസ്റ്റ് ഉണ്ടായത്. ഒപ്പം രാജ്യത്തേക്ക് വൻതോതിൽ പുകയില കടത്താനുള്ള നാല് ശ്രമങ്ങൾ പരാജയപ്പെടുത്തുകയും ചെയ്തു.
വൻതോതിൽ പുകയില കൈവശം വെച്ച അഞ്ച് കള്ളക്കടത്തുകാരെ പിടികൂടുന്ന സമയത്താണ് 51 നുഴഞ്ഞുകയറ്റക്കാരെ റോയൽ ഒമാൻ പൊലീസിന് അറസ്റ്റ് ചെയ്യാൻ സാധിച്ചത്. പിടിയിലായ ഇവർക്കെതിരെ നിയമനടപടികൾ പൂർത്തിയാക്കിയെന്നും റോയൽ ഒമാൻ പോലീസിന്റെ അറിയിപ്പിൽ പറയുന്നു.
ദോഫാർ ഗവർണറേറ്റിൽ നടന്ന മറ്റൊരു സംഭവത്തിൽ, 1216 ഘാട്ട് മയക്കുമരുന്ന് പൊതികളുമായി കടലിൽ ബോട്ടിൽ അറബ് പൗരത്വമുള്ള മൂന്ന് കള്ളക്കടത്തുകാരെ കോസ്റ്റ് ഗാർഡ് പോലീസ് അറസ്റ്റ് ചെയ്തു. ഇവർക്കെതിരെയുള്ള നിയമനടപടികൾ പൂർത്തിയായി വരികയാണ്. അതെ സമയം തിങ്കളാഴ്ച, ദോഫാർ ഗവർണറേറ്റിൽ, ഷുവൈമിയ വിലായത്തോട് ചേർന്നുള്ള അറബിക്കടലിൽ ഫിഷറീസ് കൺട്രോൾ ടീം പരിശോധന നടത്തുന്നതിനിടെ, ലൈസൻസില്ലാതെ മത്സ്യബന്ധനം നടത്തുന്ന മത്സ്യബന്ധന ബോട്ടുകളിലെ 22 കുടിയേറ്റ തൊഴിലാളികളെ പിടികൂടി. ഇവരുടെയും നിയമനടപടികൾ പുരോഗമിക്കുകയാണ് .
