ലീഗ് വണിൽ മെസ്സിയുടെ തകർപ്പൻ ഗോളിൽ പി എസ് ജിക്ക് വിജയം. എംബപ്പെയും നെയ്മറും ഇല്ലാതെ ഇറങ്ങിയ പി എസ് ജി ടുലൂസിനെ ഒന്നിനെതിരെ രണ്ടു ഗോളുകൾക്കാണ് പരാജയപ്പെടുത്തിയത്. തുടക്കത്തിൽ ഒരു ഗോളിന് പിറകിൽ പോയ ശേഷമായിരുന്നു പി എസ് ജിയുടെ വിജയം. ഇരുപതാം മിനുട്ടിൽ വാൻ ഡെൻ ബൂമൻ ആണ് ടുലൂസിന് ലീഡ് നൽകിയത്. അച്റഫ് ഹകീമിയുടെ ഗോളിലൂടെ 38ആം മിനുട്ടിൽ പി എസ് ജി സമനില പിടിച്ചു. പിന്നെ വിജയ ഗോളിനായുള്ള ശ്രമം ലയണൽ മെസ്സിയിലൂടെ പി എസ് ജി ആശങ്കയ്ക്ക് പരിഹരിച്ചു. 58ആം മിനുട്ടിൽ ഹകീമി കൊണ്ടു വന്ന പന്ത് സ്വീകരിച്ച് മെസ്സി തൊടുത്ത ഷോട്ട് തടയാൻ കീപ്പറിന് ആകുമായിരുന്നില്ല. സ്കോർ 2-1.ഈ വിജയത്തോടെ പി എസ് ജി ഒന്നാം സ്ഥാനത്തുള്ള ലീഡ് 8 പോയിന്റാക്കി ഉയർത്തി. 22 മത്സരങ്ങളിൽ നിന്ന് 54 പോയിന്റാണ് പി എസ് ജിക്ക് ഉള്ളത്.