ലോഡ്‌സ് ടെസ്റ്റിൽ ശ്രീലങ്കയ്ക്കെതിരെ ഇം​ഗ്ലണ്ടിന് 190 റൺസ് വിജയം. മൂന്ന് ടെസ്റ്റുകളുടെ പരമ്പരയിൽ രണ്ടാം മത്സരവും വിജയിച്ചതോടെ ഇംഗ്ലണ്ട് പരമ്പര വിജയം സ്വന്തമാക്കി. 483 റൺസ് വിജയത്തി​ലേക്ക് ബാറ്റ് വീശിയ ശ്രീലങ്ക 292 റൺസിൽ എല്ലാവരും പുറത്തായി. നേരത്തെ രണ്ടിന് 53 എന്ന നിലയിലാണ് ലങ്ക നാലാം ദിവസം ബാറ്റിം​ഗ് ആരംഭിച്ചത്.

55 റൺസെടുത്ത ദിമുക്ത് കരുണരത്നെ, 58 റൺസെടുത്ത ദിനേശ് ചന്ദിമാൽ, 50 റൺസെടുത്ത ധനഞ്ജയ ഡി സിൽവ, 43 റൺസെടുത്ത മിലൻ രഥ്നായകെ എന്നിവർ മാത്രമാണ് ലങ്കൻ നിരയിൽ ഭേദപ്പെട്ട പ്രകടനം പുറത്തെടുത്തത്. ഇം​ഗ്ലണ്ടിനായി ​ഗസ് ആറ്റ്കിൻസൺ അഞ്ച് വിക്കറ്റെടുത്തു. ഒലി സ്റ്റോണും ക്രിസ് വോക്സും രണ്ട് വീതം വിക്കറ്റുകളെടുത്തു.

മത്സരത്തിൽ ആ​ദ്യം ബാറ്റ് ചെയ്ത ഇം​ഗ്ലണ്ട് ഒന്നാം ഇന്നിം​ഗ്സിൽ 427 റൺസെടുത്തു. മറുപടി പറഞ്ഞ ശ്രീലങ്ക ഒന്നാം ഇന്നിം​ഗ്സിൽ 196 റൺസിൽ എല്ലാവരും പുറത്തായി. 231 റൺസിന്റെ ലീഡാണ് ഒന്നാം ഇന്നിം​ഗ്സിൽ ഇംഗ്ലണ്ട് നേടിയത്. രണ്ടാം ഇന്നിം​ഗ്സിൽ ഇം​ഗ്ലണ്ട് 251 റൺസിൽ ഓൾ ഔട്ടായതോടെ ലങ്കയുടെ വിജയലക്ഷ്യം 483 ആകുകയായിരുന്നു.