ഇംഗ്ലീഷ് പ്രീമിയർ ലീഗ് കിരീടം സ്വന്തമാക്കി മാഞ്ചസ്റ്റർ സിറ്റി. തുടർച്ചയായി നാലാം തവണ പ്രീമിയർ ലീഗ് കിരീടം നേടുന്ന ആദ്യ ടീം ആയി ഈ നേട്ടത്തോടെ സിറ്റി മാറി. നിർണായകമായ അവസാന മത്സരത്തിൽ ഒന്നിനെതിരെ മൂന്ന് ഗോളുകൾക്ക് വെസ്റ്റ് ഹാം യുണൈറ്റഡിനെ ആണ് പെപ് ഗ്വാർഡിയോളയുടെ ശിഷ്യന്മാർ തോൽപ്പിച്ചത്. മത്സരത്തിൽ ഫിൽ ഫോഡൻ ഇരട്ട ഗോൾ നേടിയപ്പോൾ റോഡ്രി ആണ് വിജയമുറപ്പിച്ച മൂന്നാം ഗോൾ നേടിയത്. മുഹമ്മദ് കദുസ് വെസ്റ്റ് ഹാമിന്റെ ആശ്വാസ ഗോൾ നേടി.
38 മത്സരങ്ങളിൽ നിന്ന് 91 പോയിൻ്റുകൾ നേടിയാണ് മാഞ്ചസ്റ്റർ സിറ്റിയുടെ വിജയം. എവർട്ടണെ ഒന്നിനെതിരെ രണ്ട് ഗോളിന് തോൽപ്പിച്ച ആഴ്സണൽ 89 പോയിന്റോടെ രണ്ടാം സ്ഥാനത്ത് ഫിനിഷ് ചെയ്തു. വൂൾവ്സിനെ എതിരില്ലാത്ത രണ്ടു ഗോളിന് കീഴടക്കിയ ലിവർപൂൾ 82 പോയിന്റുമായി മൂന്നാം സ്ഥാനം നില നിർത്തി.