ഇംഗ്ലീഷ് ഫുട്‌ബാളിലെ ഗ്ലാമർ ക്ലബുകളിലൊന്നായ മാഞ്ചസ്റ്റർ യുനൈറ്റഡിന്റെ 25 ശതമാനം ഓഹരികൾ ഇനി ലണ്ടൻ ആസ്ഥാനമായ ‘ഇനിയോസ്’ ഗ്രൂപ്പ് ചെയർമാനും, ഇംഗ്ലണ്ടിലെ ഏറ്റവും വലിയ സമ്പന്നരിൽ ഒരാളുമായ ജിം റാറ്റ്ക്ലിഫിന് സ്വന്തം. മാഞ്ചസ്റ്റർ യുണൈറ്റഡ് ക്ലബ് അധികൃതർ തന്നെയാണ് സമൂഹമാധ്യമങ്ങളിലൂടെ ഔദ്യോഗികമായി ഈ വിവരം അറിയിച്ചത്. 1.25 ബില്യൺ പൗണ്ടാണ് (1.6 ബില്യൺ ഡോളർ) ഓഹരി സ്വന്തമാക്കാൻ 71കാരൻ ചെലവിടുന്നത്. ക്ലബിന്റെ ഓൾഡ് ട്രാഫോർഡ് സ്റ്റേഡിയത്തിലെ ഭാവി ഭാവി നിക്ഷേപത്തിനായി 300 ദശലക്ഷം ഡോളറും നൽകും.

മുമ്പ് മാഞ്ചസ്റ്റര്‍ യുണൈറ്റഡിനെ സ്വന്തമാക്കാനുള്ള ശ്രമത്തില്‍ നിന്ന് ഖത്തര്‍ വ്യവസായി ഷെയ്ക്ക് ജസ്സീം പിന്മാറിയിരുന്നു. ഷെയ്ക്ക് ജസ്സീം അവതരിപ്പിച്ച ലേലതുക തള്ളിയതിന് പിന്നാലെ ആയിരുന്നു പിന്മാറ്റം. ക്ലബിന്റെ പൂര്‍ണ്ണ ഉടമസ്ഥതയും ഏറ്റെടുക്കാമെന്നായിരുന്നു ഷെയ്ക്ക് ജസ്സീം വാഗ്ദാനം ചെയ്തത്. അതെ സമയം ഫുട്‌ബോളിന്റെയും ക്ലബിന്റെയും ഉയര്‍ച്ചയ്ക്ക് പുതിയ കരാര്‍ ഉപകരിക്കുമെന്ന് ക്ലബ്ബിന്റെ പ്രതിനിധികള്‍ പ്രതികരിച്ചു. മാഞ്ചസ്റ്റര്‍ യുണൈറ്റഡിന്റെ വലിയ ആരാധകന്‍ കൂടിയാണ് റാറ്റ്ക്ലിഫ്.