ടി-20 ലോകകപ്പിൽ പാകിസ്താനെ പരാജയപ്പെടുത്തിയതിന് പിന്നാലെ ജസ്പ്രീത് ബുംറയെ അഭിനന്ദിച്ച് ഇന്ത്യൻ ക്യാപ്റ്റൻ രോഹിത് ശർമ്മ. ബൗളർമാർ പന്തുകൊണ്ട് കരുത്ത് കാട്ടാൻ ആഗ്രഹിക്കുന്നവരാണ്. അതിൽ ബുംറ കൂടുതൽ കരുത്തനാകുന്നു. അയാളെക്കുറിച്ച് കൂടുതൽ സംസാരിക്കേണ്ടതില്ല. ഈ ലോകകപ്പ് അവസാനിക്കും വരെ ബുംറ ഈ രീതിയിൽ പന്തെറിയണം. ബൗളിംഗിൽ ബുംറ ഒരു ഇതിഹാസമെന്നും ഇന്ത്യൻ ക്യാപ്റ്റൻ പ്രതികരിച്ചു.
ഇന്നലെ നടന്ന മത്സരത്തിൽ ഒരിക്കല്‍ക്കൂടി പാകിസ്താനെ വീഴ്ത്തി ഇന്ത്യ കരുത്തുകാട്ടിയിരിക്കുകയാണ്. ടി20 ലോകകപ്പിലെ ആവേശകരമായ മത്സരത്തില്‍ ആദ്യം ബാറ്റ് ചെയ്ത ഇന്ത്യ 19 ഓവറില്‍ 119 റണ്‍സിന് ഓള്‍ഔട്ടായപ്പോള്‍ മറുപടിക്കിറങ്ങിയ പാകിസ്താന് 7 വിക്കറ്റിന് 113 റണ്‍സാണ് നേടാനായത്. ഇന്ത്യയെ ചെറിയ സ്‌കോറിലേക്കൊതുക്കിയപ്പോള്‍ പാകിസ്താന് സജീവ വിജയ പ്രതീക്ഷയിലായിരുന്നു. എന്നാല്‍ ജസ്പ്രീത് ബുംറയുടെ തകര്‍പ്പന്‍ പ്രകടനമാണ് പാകിസ്താനെ തകര്‍ത്തത്.
അമേരിക്കയിലേക്ക് ബാഗും പാക്ക് ചെയ്ത് വന്നത് വെറുതേ ആയില്ലെന്നും, പിച്ചിൽ നിന്ന് ലഭിക്കുന്ന പിന്തുണ പരമാവധി ഉപയോഗിക്കുമെന്നു മത്സര ശേഷം ബുംറ പ്രതികരിച്ചു. “ചെറുപ്പം മുതൽ ഒരുപാട് ക്രിക്കറ്റ് കളിക്കുന്നതാണ്. ബാറ്റർമാർക്കും ബൗളർമാർക്കും ഒരുപോലെ പിന്തുണ ലഭിക്കുന്ന മത്സരങ്ങൾ കാണാനാണ് താൻ ഇഷ്ടപ്പെടുന്നത്. ബാറ്റിംഗ് പ്രകടനങ്ങൾ മാത്രം ഉണ്ടാകുമ്പോൾ താൻ ടി വി ഓഫ് ചെയ്യും.’ ബുംറ പറഞ്ഞു. പിച്ചിൽ നിന്ന് പിന്തുണ ലഭിക്കുമ്പോൾ ഫുൾ ലെങ്തിൽ പന്തെറിയാൻ താൻ ശ്രമിക്കും. ചിലപ്പോൾ അത് മാജിക് പന്തുകളായി മാറും. ഇന്ത്യൻ ടീം പന്തെറിയാൻ എത്തിയപ്പോൾ സ്വിംഗും പേസും കുറഞ്ഞു. റൺസടിക്കാൻ എളുപ്പമായി. വിജയിക്കാൻ എത്ര റൺസ് വേണമെന്ന് പാകിസ്താന് അറിയാമായിരുന്നു. അതിനാൽ പാകിസ്താനെതിരെ മാജിക് പന്തുകൾ പരീക്ഷിക്കാതെ ലൈനും ലെങ്തും കൃത്യമാക്കാൻ ശ്രമിച്ചു. ഇതാണ് പാകിസ്താനെ സമ്മർദ്ദത്തിലാക്കിയതെന്നും ബുംറ പ്രതികരിച്ചു.
